മാണിക്യക്കല്ല്

എന്നെ കളഞ്ഞെന്നാലതു
നിന്റെ മിടുക്കല്ല ചങ്ങാതീ,
ചന്ദനം ചാരി മടുത്തത്
ചേറു പുരളാൻ ചങ്ങാതീ...
ആറ്റിൽക്കളഞ്ഞൊരീ മാണിക്യ
ക്കല്ലു തെരയണ നേരത്ത്
നാളെ നിൻ കയ്യിലിരുന്നു
ചിരിക്കും വെള്ളാരങ്കല്ലൊന്ന്

                   

തണൽ

തണലാഗ്രഹിച്ചിരുന്നു അതി
തീ വ്രമായി....
പൊള്ളുന്ന വെയിലത്ത് അമ്മയോടൊപ്പം വിയർത്തൊലിച്ച് നടന്ന നേരത്ത്
പ്രിയമോടെ വാരിപ്പുണരുന്ന അച്ഛന്റെ ആൽമരത്തണലിന് തീരാത്ത കൊതിയായിരുന്നു.
കിട്ടാതെ വന്നപ്പോൾ...

തണലാഗ്രഹിച്ചിരുന്നു അതി തീവ്രമായി,
ആദ്യ സന്താനമായി ജനിച്ചു തോറ്റപ്പോൾ
വലതുകരത്തിൽ ചേർത്തണക്കുന്ന ജേഷ്ഠന്റെ
മാമ്പഴത്തണലിന് തീരാത്ത കൊതിയായിരുന്നു
കിട്ടാതെ വന്നപ്പോൾ....

തണലാഗ്രഹിച്ചിരുന്നു അതിതീവ്രമായി
പാതിയിൽ മുറിഞ്ഞുപോയ ജീവനാഡി പോലെ
നെഞ്ചിൽ തലചേർത്തുറക്കിയിരുന്ന നല്ല പാതിയുടെ
കണ്ടൽക്കാടിനാർദ്ര സംഗീതത്തിൽ ഭ്രമിച്ചു പോയിരുന്നു,
പ്രളയത്തിലൊരു ദിവസമെല്ലാം കുത്തിയൊലിച്ചു പോയപ്പോൾ
തണലേ വെറുത്തു പോയി അതിതീവ്രമായി

ഇനി ,
ഞാൻ കാടായി മാറുന്നൊരൊറ്റ മരം
കൊണ്ടു ശീലിച്ച കനൽ വെയിലും ,
പെയ്തു നനച്ച് തോറ്റു പോയ പേമാരിയും,
പേടിപ്പിക്കാനാവാതെ പോയ കൊള്ളിയാനും,
ഹരം പിടിപ്പിച്ചു തുടങ്ങിയപ്പോൾ
തണൽ തേടിത്തേടി ഞാനിതാ തണലായി മാറുകയാണ്!
ആകാശത്തോളം ഇല വിരിച്ച്
പ്രപഞ്ച സീമ യോളം കൈകൾ നീട്ടി
തണലന്വേഷിച്ചു തോറ്റു പോകാതിരിക്കാൻ
എന്റെ കുഞ്ഞിക്കിളിക്കും
ഇനിയൊരായിരം കിളിക്കുഞ്ഞുങ്ങൾക്കും .....

                                             

യാത്ര

തിരക്കു കൊണ്ടു മാറ്റി വെച്ച
എത്രയെത്ര
സ്വപ്ന യാത്രകൾ  ???
ഒഴിവുകാലത്തവ
കുത്തിനോവിക്കുമ്പോൾ
 ചിരി വരുന്നു ...
എന്തിനായിരുന്നു
പണിപ്പെട്ടി ത്ര നാൾ

നമ്മൾ
തിരക്കിട്ട് കിതച്ചോടിയിരുന്നത്?
ശരീരമില്ലാത്ത ലോകത്ത് നീയും
മനസ്സില്ലാത്ത ലോകത്ത് ഞാനും
എന്നെന്നുമിങ്ങനെ
കാണാമറയത്ത്
തനിച്ചിരിക്കാനോ?
ഓർത്തുനോക്കിയാൽ
ജീവിതം ...
എന്തൊരു തമാശയാണല്ലേ?
                                       

ജീവിതപ്പകൽ

നടന്നു തീർത്ത കനൽ വഴികളിലൂടെയുള്ള
തിരിച്ചു നടത്തം
കുടിച്ചു വറ്റിച്ച കണ്ണീർക്കടലിലേക്കുള്ള
തിരിച്ചൊഴുക്ക്
കടിച്ചു കുടഞ്ഞ ഏകാന്തതയിലേക്കൊരു
തനിച്ചു മടക്കം
എടുത്തെറിഞ്ഞ ഇരുട്ടിന്റെ കരിമ്പടത്തിലേക്കൊരു
നുഴഞ്ഞു കയറ്റം
ആവലാതികളുടെ കെട്ടഴിക്കാനും
ആവനാഴിയിലെ അമ്പുകുലക്കാനും
അരുതുകളെ എറിഞ്ഞുടക്കാനും
പുഞ്ചിരിയോടെ ചേർത്തു പിടിക്കാൻ
നീയില്ലാതായതിൽ പിന്നെ
ഞാനിങ്ങനെയൊക്കെയാണ് ....
ഉള്ളു പൊള്ളിക്കുന്ന ഉച്ചതിരിയുന്നതേ ഉള്ളു
സന്ധ്യയും കഴിഞ്ഞല്ലേ തീരൂ
അസ്വസ്ഥതകളുടെ ഈ തീരാപ്പകൽ ......

കനലുരുള

ഉണ്ടു കൊണ്ടിരിക്കുമ്പോഴാകും,
 ചിരിയോടെ അവനെഅതൂട്ടിയതും
രുചിയോടെ അവനതു കഴിച്ചതും
നെഞ്ചിൽ തികട്ടി വരിക
ഒരു തുള്ളി കണ്ണീരുറ്റിച്ച്
തേങ്ങലോടെ ഇല മടക്കി
എഴുനേൽക്കയായി പിന്നെ ....
അറിയണം ....
ചെന്നു കാണണം .. ..
എല്ലാ കൊലപാതകികളും ....
നിത്യം വെന്തു കൊണ്ടിരിക്കുന്ന
ആ പെൺകനൽ രൂപങ്ങളെ ....
എന്ത് കണക്ക് തീർക്കാനാണെങ്കിലും
തിന്നാനല്ലാതെ ,നിങ്ങളവനെ
കൊല്ലാൻ പോകുന്നതിനു മുമ്പ് .

                                       

എന്റെ ദുഖമൊന്നു മാത്രമല്ല നിന്റെ ദുഖവും
എന്റെ കണ്ണില്‍ കണ്ണുനീര്‍ മണികളായി മാറണം
എന്റെചോര ചിന്തിടുന്ന മുറിവുകള്‍ക്കു മുകളിലായ്
നിന്റെ നോവുകള്‍പടര്‍ന്നു ഞാന്‍പിടഞ്ഞുണരണം
നിന്റെചോരയില്‍ പടുത്തുയര്‍ത്തുരില്ലൊരിക്കലും
എന്റെ ദന്തഗോപുരങ്ങള്‍ ഞാന്‍മരിക്കുവോളവും
യുദ്ധമല്ലെനിക്കുവേണ്ടതാത്മ സൗഹൃദങ്ങള്‍തന്‍
സ്വച്ഛനീല വാനവും ചുണ്ടില്‍ മന്ദഹാസവും.....

പണ്ടു വരച്ചു മറന്നൊരു ചിത്രം
കണ്ടിതുപോലെന്‍ പഴയൊരു താളില്‍
ഉണ്ടോ നെഞ്ചില്‍ പണ്ടിതുപോല്‍ ഞാ-
നെഴുതി മറന്നൊരു നിന്‍ മുഖചിത്രം.......??????

പ്രണയ മേഘ മുരുകി വീണ ഗ്രീഷ്മ സന്ധ്യ യില്‍
ഒഴുകിവന്നു ഗസലു പേലൊരോര്‍മ്മയിന്നലെ
വെറുതെ താളമിട്ടുപെയ്ത മഴയിലൂറിയോ
എഴുതുവാന്‍ മറന്ന വിരഹ ഗാനമെന്തിനോ......
                                                           ( പ്രണയ..... )
ഒരു തരി കുങ്കുമം തൊടുകുറി ചന്ദനം
വാര്‍മുടിയഴകിലോ കമലദളം
ഒരു മഞ്ഞു തുള്ളിയായ് മിഴി കൂമ്പി നിന്നു നീ
ശ്രുതി ചേര്‍ന്നു പാടുമെന്‍ ദല മര്‍മ്മരങ്ങളില്‍
കരള്‍ നീറുന്നൊരു നോവില്‍ നറു നവനീതം ചൊരിയുമാര്‍ദ്ര
                                                              ( പ്രണയ..... )
 മൃദു പദ പല്ലവം നൂപുര നിസ്വനം
നയനമനോഹരം ദ്രുതചലനം
പ്രിയ ലാസ്യ വര്‍ണമായ് മിഴിയില്‍തുളുമ്പി നീ
കുളിരൂര്‍ന്നു വീഴുമീ  കിളി കൂജനങ്ങളില്‍
നിഴല്‍ നീന്തുന്നൊരു നിനവില്‍ നിറദീപങ്ങള്‍ വിടരുമരുണ
                                                                   ( പ്രണയ..... )

 


  സങ്കടക്കടലില്‍ മുങ്ങാനെങ്കില്‍
  എന്തിനെനിക്കീ സൗഹൃദനൗക
  വെന്തുപോകുമെന്‍ നെഞ്ചകവും
  തീവാക്കുതുപ്പിയതു നീയായാലും........