ഞാനെന്റെ മുഖം കാണാന്‍,
നിന്റെ ആഴങ്ങളിലേക്ക് സൂക്ഷിച്ചുനോക്കി
കാറും കോളുമില്ലാതിരുന്നിട്ടും
നിന്റെ സുതാര്യതയില്‍ ഞാന്‍
പ്രതിബിംബിക്കപ്പെട്ടില്ല...
നിരാശയില്‍ വീര്‍ത്തുകെട്ടിയ
ഹൃദയഭിത്തിയില്‍ ഞാനിങ്ങനെ കോറിയിട്ടു
നിന്റെ സൗഹൃദം സത്യമല്ല.
പ്രതിഷേധക്കനല്‍വഴിയിലൂടെ,
വേദനയുടെ ചുഴലിക്കാറ്റുവീശി ,
കുതിച്ചുപാഞ്ഞുചെന്ന്
ഞാനൊരു കണ്ണാടിവാങ്ങി.
ചാഞ്ഞുംചരിഞ്ഞും നോക്കിയിട്ടും
എനിക്കെന്നെ കാണാനായില്ല.
വാങ്ങിനോക്കി കടക്കാരന്‍പറഞ്ഞു
മറുവശത്തു രസംപുരണ്ടിട്ടില്ല
വേറെതരാം.
വേണ്ട....കുറ്റബോധത്തോടെ,
കുനിഞ്ഞശിരസ്സോടെ, പതിയെ
തിരിച്ചുനടന്നു
ഞാനും നിന്റെ സൗഹൃദത്തിനുമറുപുറം
വിശ്വാസ രസം പുരട്ടാന്‍
മറന്നുപോയിരുന്നല്ലോ......
