പ്രണയം
കനല്‍ വാക്കുകളുടെ ചുംബനം
പൊള്ളലേല്‍ക്കാതെ ഏറ്റുവാങ്ങി
കവിളില്‍ ചെന്താമരവിരിയിച്ച
കൂട്ടുകാരിയോടവനുതോന്നിയ
വീര്യം കൂടിയൊരസൂയ.....
ഭയം
ഒച്ചിനെപ്പോലെ
അരിച്ചരിച്ചാണു വരിക
ഒരിക്കലൊന്നു തൊട്ടുനോക്കുകയേ വേണ്ടൂ
വഴുവഴുത്തങ്ങനെ ഒട്ടിനില്‍ക്കും
താപനം
പറയാനാശിച്ചതൊരുകടല്‍
വാക്കിലൊതുങ്ങിയതൊരു പുഴ
പറയാന്‍ തുനിഞ്ഞതൊരരുവി
പറഞ്ഞുതീര്‍ത്തതൊരു കവിള്‍
നീകേട്ടുനിന്നതതിലൊരു തുള്ളി....
ഓര്‍മ്മ
നനവുള്ളൊരു തണുത്ത നിഴല്‍
ഊളിയിട്ടൂളിയിട്ടൊടുവില്‍
തിരിച്ചുനീന്തിക്കേറാന്‍ മറന്ന്
അലിഞ്ഞലിഞ്ഞുതീരാവുന്നത്ര
ആഴമുള്ളൊരു നിഴല്‍....
മറവി
ക്രമരഹിതമായ നിഴല്‍വക്കിലെ
അലഞൊറികള്‍ക്കപ്പുറം
കണ്ണുകലിപ്പിച്ച് തിളച്ചുതൂവുന്ന
തെളിച്ചമേറിയൊരു മഞ്ഞവെളിച്ചം....
