മനസ്സിന്‍ മണ്‍ചുവരില്‍
ചുവര്‍ച്ചിത്രങ്ങള്‍,
കാലംമായ്ക്കാത്ത
നിറമുള്ള ചിത്രങ്ങള്‍,
ഓര്‍മ്മയില്‍ മഴപെയ്തു
തോരുമ്പോഴൊക്കെയും,
ഇന്നെഴുതിയതെന്നു
തോന്നുന്നചിത്രങ്ങള്‍.
ഓര്‍മ്മയുണ്ടോ
നിനക്കാസ്നേഹചിത്രങ്ങള്‍,
മിഴിമുനയാല്‍നമ്മ-
ളെഴുതിയ ചിത്രങ്ങള്‍...
നിഴലുകളില്ലാത്ത
രൂപങ്ങളില്‍ നിത്യ
നിഴലായലിയാന്‍
കൊതിയൂറുംചിത്രങ്ങള്‍,
തല്ലിത്തലോടും
തിരയായെന്‍തീരത്ത്
നീയുമുണ്ടായിരുന്ന
പകലിന്റെ ചിത്രങ്ങള്‍,
ഓര്‍മ്മയുണ്ടോ
നിനക്കാസ്നേഹചിത്രങ്ങള്‍,
വെയിലിനും
കുളിരുണ്ടെന്നോതിയചിത്രങ്ങള്‍...
ഇനിയൊരു തൂലിക
മഷിമുക്കിയെഴുതാന്‍
പഴുതുകളില്ലാത്ത
പരിപൂര്‍ണ്ണചിത്രങ്ങള്‍.
നോവിന്‍മുള്ളുകള്‍പോലും
തലോടിനീ,
പൂവിതളാക്കിയ
പ്രിയമുള്ളചിത്രങ്ങള്‍.
ഓര്‍മ്മയുണ്ടോ
നിനക്കാവര്‍ണ്ണചിത്രങ്ങള്‍,
സൗഹൃദ സംഗീത
സാഗരചിത്രങ്ങള്‍....
എല്ലാം കൂടി കുറെയേറെ ചിത്രങ്ങൾ, മനോഹരമായിരിക്കുന്നു
ReplyDeleteഓര്‍മ്മയുണ്ടോ??
ReplyDeleteഇല്ല..ഇതൊന്നും ഞാന്‍ ഓര്‍ക്കുന്നതേയില്ല. എനിക്ക്‌ തന്മാത്ര ഡിസീസ്‌ വല്ലതുമാണോ എന്റെ ദൈവമേ???
പിന്നെ ചിത്രങ്ങള്‍ ഈ ബ്ലോഗിനു കൂടുതല്‍ മിഴിവേകുന്നു..
എല്ലാ ആശംസകളോടെ.
സസ്നേഹം,
സെനു, പഴമ്പുരാണംസ്‌.
ആ മണ്ചുമര് തൂത്ത് വെടിപ്പാക്കി വെക്കൂ.
ReplyDelete